ടൈം ട്രാവൽ സാധ്യമോ ?

ഒരു ത്രിമാന ലോകത്തിൽ രണ്ട് ബിന്ദുക്കൾക്കിടയിൽ യാത്ര ചെയ്യുന്നതുപോലെ സമയത്തിൽ രണ്ട് ബിന്ദുക്കൾക്കിടയിൽ യാത്ര ചെയാം എന്ന സാമാന്യസങ്കല്പം ആണ് ടൈം ട്രാവൽ അഥവാ സമയ സഞ്ചാരം. പൊതുവേ ഭൂതകാലത്തിലേക്കും ഭാവികാലത്തിലേക്കും സമയ യാത്രകൾ നടത്തപ്പെടാം എന്നു കരുതുന്നു. ഇത്തരം യാത്രകൾക്ക് സഹായിക്കുന്ന തരം യന്ത്രങ്ങളെ പൊതുവേ ടൈം മെഷീനുകൾ അഥവാ സമയ യന്ത്രങ്ങൾ എന്നു വിളിക്കപ്പെടുന്നു.

സ്റ്റീഫൻ ഹോക്കിങിന്റെ സിദ്ധാന്തമനുസരിച്ച് ഒരാൾ പ്രകാശ വേഗതയിൽ സഞ്ചരിച്ചാൽ ഭാവിയിൽ എത്താം. സമയം എന്നത് എപ്പോളും ദൂരവും വേഗതയുമായി ബന്ധപ്പെട്ടിരിക്കുന്നു. ഒരാൾ പ്രകാശവേഗതയിൽ സഞ്ചരിച്ചാൽ അയാൾക്കു വേണ്ടി സമയം മറ്റുളള വസ്തുക്കളെ അപേക്ഷിച്ചു പതുക്കെ സഞ്ചരിക്കും. അതനുസരിച്ച് ഭാവിയിലേക്കു ഒരാൾക്കു പോകാം പക്ഷെ സമയത്തിനു പുറകോട്ട് പോകാൻ കഴിയില്ല. രണ്ട് ബിന്ദുക്കൾക്കിടയിൽ യാത്ര ചെയ്യുമ്പോൾ അവ തമ്മിലുള്ള ഏറ്റവും ചെറിയ ദൂരം ഒരു നേർവരയാണു. പക്ഷെ ആ രണ്ടു ബിന്ദുക്കൾ ഒന്നിനു മുകളിൽ ഒന്നായി ഇരിക്കുമ്പോളാണ് അവ തമ്മിൽ ഒരു ദൂരവും ഇല്ലാതിരിക്കുന്നത്. അങ്ങനെ സമയത്തിലെ രണ്ട് ബിന്ദുക്കൾക്കിടയിൽ അവ തമ്മിലുള്ള ദൂരം കുറയ്ക്കുവാൻ സഹായിക്കുന്ന യന്ത്രമാണു "ടൈം മെഷീൻ" അഥവാ സമയ യന്ത്രങ്ങൾ.

ടൈം ട്രാവൽ അഥവാ സമയസഞ്ചാരം മുഖ്യ പ്രമേയമാക്കിയ നിരവധി ഹോളിവുഡ് ചലച്ചിത്രങ്ങൾ നിർമ്മിക്കപ്പെട്ടിട്ടുണ്ട്. ബാക്ക് ടു ദ ഫ്യൂച്ചർ 1,2,3 , ദി ടെർമിനേറ്റർ, ഡെജാവൂ ,ക്രിസ്റ്റഫർ നോളൻ സംവിധാനം ചെയ്ത 'ഇന്റർസ്റ്റെല്ലാർ' എന്നിവ അവയിൽ ചിലതാണ്.

നമ്മളൊക്കെ ടൈം ട്രാവലിൽ ഒരു പരിധിവരെ വിശ്വസിക്കുന്നവരാണ് അതു കൊണ്ടുതന്നെ ഈ നിമിഷം നമ്മൾ ജീവിക്കുമ്പോൾ തന്നെ നമ്മുടെ ഫ്യുച്ചറും മറ്റൊരു ഡയമെൻഷനിൽ ജീവിക്കുന്നുണ്ടെന്നു വേണം വിശ്വസിക്കുവാൻ. അതുപോലെ തന്നെ നമ്മുടെ പാസ്റ്റും കഴിഞ്ഞുപോയിട്ടില്ല, പാസ്റ്റിലും നമ്മൾ ജീവിച്ചു കൊണ്ടിരിക്കുകയാണ്. പക്ഷെ മുന്നേക്കു പോയി കൊണ്ടിരിക്കുകയാണുതാനും,അതായത് പ്രഥമദൃഷ്ട്ടിയാൽ നമ്മൾ മുന്നേക്കു നടക്കുകയാണ് പക്ഷെ ഓരോ സ്റ്റെപ്പ് വയ്ക്കുമ്പോഴും കഴിഞ്ഞുപോയ സ്റ്റെപ്പിന്റെ കൂടെത്തന്നെ നമ്മുടെ ശരീരവും മനസും അവിടെത്തന്നെ നിലനിൽക്കുകയാണ്, വീണ്ടും പുതിയൊരു സ്റ്റെപ്പ് വയ്ക്കുമ്പോൾ ശരീരത്തിന്റെയും മനസിന്റെയും ഇട്ടിരിക്കുന്ന തുണിയുടേതുപോലും പുതിയൊരു പതിപ്പ് ഉണ്ടാകുകയാണ് ചെയ്യുന്നത് എന്നുവേണം കരുതാൻ. ഇതുപോലെയുള്ള ഓരോ കഴിഞ്ഞുപോയ പതിപ്പിന്റെയും മുന്നേ പോകുന്ന പതിപ്പിന്റെയും യാഥാർഥ്യമാണ് നിലവിലെ നമ്മൾ.

“സമയമാം നദി പുറകോട്ടൊഴുകി

സ്മരണതന്‍ പൂവണിത്താഴ്വാരയില്‍

സംഭവമലരുകള്‍ വിരിഞ്ഞുവീണ്ടും.”

പക്ഷേ, സമയമാകുന്ന നദി പുറകോട്ടൊഴുകി താന്‍ സ്മരണയുടെ താഴ്വാരയില്‍ എത്തി, ഭൂതകാലസംഭവങ്ങള്‍ മലരുകളായി വിരിയുന്നത്‌ ദര്‍ശിച്ചെന്ന ആ നായികയുടെ അഭിപ്രായം, ഫിസിക്സിന്റെ കാഴ്ചപ്പാടില്‍ നിഷേധിക്കുകയല്ലാതെ വേറെ നിവൃത്തിയില്ല. സ്വന്തം ഓര്‍മ്മയുടെ അലമാരയില്‍ നിന്നും ചില പഴയ ‘പുസ്തകങ്ങള്‍’ എടുത്തു മറിച്ചു നോക്കുക മാത്രമാണു ഇവിടെ ആ നായിക ചെയ്യുന്നത്‌. അല്ലാതെ, അത് സമയത്തിലൂടെ പിന്നോട്ടുള്ള അവളുടെ ഒരു യാത്രയല്ല. ചിന്തകളിലൂടെ ഭൂതകാലത്തില്‍ എത്തുന്നതുവഴി ഭൗതികമായി അവളില്‍ എന്തെങ്കിലും മാറ്റം സംഭവിക്കുകയോ, അവള്‍ അന്നത്തെ വ്യക്തി ആവുകയോ ചെയ്യുന്നില്ല.

ഇതുപോലെതന്നെയാണ്‌ ചില സയന്‍സ് ഫിക്ഷന്‍ സിനിമകളിലെ ‘ടൈം ട്രാവലും’. അവിടെയും സമയം പിന്നോട്ട് സഞ്ചരിക്കുന്നില്ല. സംഭവിക്കുന്നത്‌, ഒന്നോ ഒന്നിലധികമോ മനുഷ്യര്‍, അവര്‍ സ്പെയ്സിന്റെ (സ്ഥലം/ദൂരം) ഭാഗം ആയിരിക്കുമ്പോള്‍ തന്നെ, ബാക്കി സ്പെയ്സില്‍ നിന്നും വേര്‍പെട്ട്‌ അവരുടെ ചുറ്റുപാടുകളുടെ ഭൂതകാലത്തില്‍ എത്തിച്ചേരുക മാത്രമാണ്‌ ചെയ്യുന്നത്. അതുവഴി, യഥാര്‍ത്ഥത്തില്‍ അവരോ മറ്റുള്ള ആരെങ്കിലുമോ സമയത്തിലൂടെ പിന്നോട്ടു യാത്ര ചെയ്യുന്നില്ല. ഭൂതകാലത്തിലേക്കുള്ള യാത്ര അവരുടെ പ്രായത്തിനേക്കാള്‍ ദൈര്‍ഘ്യമേറിയതായാലും അവര്‍ ഇല്ലാതാവുന്നില്ല, ഭൂതകാലത്തില്‍ എത്തിയശേഷവും സമയത്തിന്റെ ഗതി അവര്‍ക്കും മുന്നോട്ടു തന്നെയാണ്, അവിടെയെത്തുന്നതു വഴി ഭാവികാലത്തിന്റെ ഒരു ഭാഗമായി മാറുന്ന അവരുടെ ഓര്‍മ്മയും അവര്‍ക്കു നഷ്ടപ്പെടുന്നില്ല മുതലായ വസ്തുതകള്‍ അവിടെ സമയത്തിന്റെ ദിശയില്‍ മാറ്റമൊന്നും സംഭവിച്ചിട്ടില്ല എന്നതിനു തെളിവാണ്‌. സിനിമയിലെ ടൈം ട്രാവലും, സമയത്തിലൂടെ പുറകോട്ടുള്ള സഞ്ചാരം എന്ന അര്‍ത്ഥത്തിലെ ശാസ്ത്രീയമായ ടൈം ട്രാവലും രണ്ടും രണ്ടാണെന്നു സാരം.

“സമയമാം നദി പുറകോട്ടൊഴുകി” എന്ന നായികയുടെ പാട്ടില്‍ തന്നെ സമയത്തിന്റെ പുറകോട്ടുള്ള ഒഴുക്ക്‌ എന്തുകൊണ്ടു സാദ്ധ്യമാവുന്നില്ല എന്നതിന്റെ വിശദീകരണമുണ്ട്. ഒഴുക്ക് എന്നത് ഒരു ചലനമാണ്. ഒരു നിശ്ചിതസമയത്തിനുള്ളില്‍ സ്പെയ്സില്‍ (സ്ഥാനം) സംഭവിക്കുന്ന സ്ഥാന വ്യതിയാനമാണ് ചലനം. അതു സംഭവിക്കുന്നത് സ്പെയ്സിലോ സമയത്തിലോ മാത്രമായല്ല, സ്പെയ്സ്-ടൈം എന്ന ഏകതയിലാണ്‌. സമയത്തെ ഒഴിവാക്കിക്കൊണ്ട് സ്പെയ്സിലൂടെ മാത്രമുള്ള ഒരു ചലനത്തിനും, സ്പെയ്സിനെ ഒഴിവാക്കിക്കൊണ്ട്‌ സമയത്തിലൂടെ മാത്രമുള്ള ഒരു ചലനത്തിനും യാതൊരു അര്‍ത്ഥവുമില്ല. ദിശയില്ലാത്ത ഒരു സമയത്തിനു നല്‍കേണ്ടിവരുന്ന വില ചലനമില്ലാത്ത ഒരു ലോകമായിരിക്കും. ചലനത്തില്‍ നിന്നും വേർതിരിച്ചെടുക്കപ്പെടുന്ന സമയം എന്നതു അതികൃത്യത ആയ ഒരു സ്ഥിരരാശി അല്ല. മാറ്റങ്ങളും ചലനവും പ്രകടിപ്പിക്കുന്നതിനുള്ള ഒരു രൂപമാണ് സമയം. 

വികസിച്ചുകൊണ്ടിരിക്കുന്ന ഒരു പ്രപഞ്ചത്തില്‍ ‘മുന്നോട്ട്’ ഒഴുകുന്ന സമയം, പ്രപഞ്ചത്തിന്റെ വികാസം എന്നെങ്കിലും അവസാനിക്കുകയും, അതിനുശേഷം ചുരുങ്ങാൻ തുടങ്ങുകയും ചെയ്യുന്നു എന്ന് സങ്കല്പിച്ചാല്‍, അപ്പോള്‍ സമയം ‘പിന്നോട്ട്’ ഒഴുകേണ്ടതല്ലേ എന്നൊരു ആശയം 1958-ല്‍ തന്നെ തോമസ് ഗോള്‍ഡ് എന്ന ആസ്റ്റ്റോഫിസിസിസ്റ്റ് മുന്നോട്ടു വച്ചിരുന്നു. ക്വാണ്ടം ഗ്രാവിറ്റേഷന്റെ ഈ വിഷയത്തിലെ പഠനങ്ങള്‍ പൂര്‍ണ്ണമല്ല എന്നതിനാല്‍, സമയത്തിന്റെ അതുപോലൊരു പിന്നോട്ടൊഴുക്കിനുള്ള ഒരു ചെറിയ സാധ്യത തള്ളിക്കളയാൻ ആവില്ലെങ്കിലും, അതിനേക്കാള്‍ കൂടുതല്‍ സാധ്യതയുള്ളത്‌, അങ്ങനെ അല്ലാതിരിക്കാനാണ്‌. അത് നമ്മള്‍ സ്വീകരിക്കുന്ന ഗണിത ശാസ്ത്രപരമായ വിശദീകരണത്തിന്റെ അടിസ്ഥാനത്തിലുള്ള ഒരു മിഥ്യാബോധം ആവാനാണ് സാദ്ധ്യത. പ്രപഞ്ചം ഒരിക്കല്‍ ഒരു സങ്കോചാവസ്ഥക്ക് വിധേയമാകുന്നുവെങ്കില്‍ അപ്പോള്‍ സമയം പിന്നോട്ടായിരിക്കും ഒഴുകുക എന്നതിനെ ന്യായീകരിക്കാന്‍ പറ്റിയ കാരണമൊന്നും തൽക്കാലം ഇല്ല.

ഗണിതശാസ്ത്രപരവും ഭൗതികവുമായ സമയങ്ങള്‍ തമ്മില്‍ തിരിച്ചറിയേണ്ടതുണ്ട്‌. ഗണിതശാസ്ത്രപരമായ സമയം കാല്പനികമാണ്, അതുപോലൊരു സമയം വീക്ഷിക്കപ്പെടുന്നില്ല. അതിനു പകരം നമ്മള്‍ കാണുന്നത് ദ്രവ്യങ്ങളുടെ ബാഹ്യകാരത്തിൽ സംഭവിക്കുന്ന മാറ്റങ്ങള്‍ മാത്രമാണ്‌; ഉദാഹരണത്തിന് ഭൂമിയുമായുള്ള സൂര്യന്റെ ആപേക്ഷികനില, ഘടികാര സൂചികളും ഘടികാരമുഖവും തമ്മിലുള്ള ആപേക്ഷിക സ്ഥാനങ്ങള്‍ മുതലായവ. അന്യദ്രവ്യങ്ങളുടെ സ്വാധീനം എത്രമാത്രം കുറഞ്ഞിരിക്കുന്നുവോ, അത്രയും കൂടുതലായിരിക്കും അത്തരം സമയമാപിനികളുടെ ഗുണനിലവാരം. പ്രപഞ്ചാരംഭം പോലെ ഉയര്‍ന്ന സാന്ദ്രത നിലവിലിരിക്കുന്ന സാഹചര്യങ്ങളില്‍ ദ്രവ്യഘടകങ്ങളുടെ സ്വാധീനം അതിശക്തമായിരിക്കും എന്നതിനാല്‍, അവിടെ സമയമാപിനികളായി പ്രപഞ്ചത്തിന്റെ വ്യാപ്തം പോലുള്ള കോസ്മൊളോജിക്കല്‍ അളവുകള്‍ ഉപയോഗിക്കേണ്ടിവരുന്നു.

ഗണിത ശാസ്ത്രപരമായ സമയത്തില്‍ നിന്നും വ്യത്യസ്തമാണ്‌ ഭൗതികമായ അനുഭവവേദ്യമായ സമയം. രണ്ടാമത്തേത് മനുഷ്യന്റെ ഓര്‍മ്മയുമായി ബന്ധപ്പെട്ടതാണെങ്കില്‍, ആദ്യത്തേത് അതുപോലൊരു ബന്ധം ഇല്ലാത്തവിധം പ്രകൃതിയെ വിശദീകരിക്കാനുള്ളതാണ്‌. വ്യക്തിനിഷ്ഠമായി സമയത്തിന്റെ വേഗതയില്‍ ഏറ്റക്കുറച്ചിലുകള്‍ അനുഭവപ്പെടാമെങ്കിലും, പിടിച്ചുനിര്‍ത്താനാവാതെ അനുസ്യൂതം ‘മുന്നോട്ട്‌’ പോയിക്കൊണ്ടിരിക്കുന്ന ഒരു അളവാണ് സമയം. ഭൂതകാലത്തെപ്പറ്റി സ്മരിക്കാനും, ഭാവികാലത്തെപ്പറ്റി ചിന്തിക്കാനും ഓര്‍മ്മ എന്ന പ്രതിഭാസമാണ്‌  കാരണമാവുന്നത്‌. പഴക്കം കുറഞ്ഞ അനുഭവങ്ങള്‍, പഴക്കം കൂടിയ അനുഭവങ്ങളുടെ ഭാവികാലം എന്ന രീതിയില്‍ ഓര്‍മ്മയില്‍ പുനര്‍ നിര്‍മ്മിക്കപ്പെടുന്നു. ഐൻസ്റ്റീന്റെ ആപേക്ഷികതാ സിദ്ധാന്തത്തിനു ശേഷം സ്പെയ്സ്, ടൈം എന്നിവ വ്യത്യസ്തമായ മൂല്യങ്ങളല്ലെന്നും, പരസ്പരം ബന്ധപ്പെട്ടു കിടക്കുന്നവയും, രൂപാന്തരം സംഭവിക്കാവുന്നവയും ആണെന്നും മനുഷ്യര്‍ മനസ്സിലാക്കി. എങ്കിലും സ്ഥലവും കാലവും വ്യത്യസ്ത സ്വഭാവങ്ങള്‍ പ്രകടിപ്പിക്കുന്നവയാണ്‌. സ്ഥലവും കാലവും ഒരുപോലെ പെരുമാറുന്നവ ആയിരുന്നെങ്കില്‍ സമയത്തിലൂടെ പുറകോട്ട് സഞ്ചരിച്ച് ഭൂതകാലത്തില്‍ സംഭവിച്ച തെറ്റുകള്‍ തിരുത്തുകയോ, കളഞ്ഞുപോയ സാധ്യതകൾ  ഉപയോഗപ്പെടുത്തുകയോ ഒക്കെ ചെയ്യാമായിരുന്നു.

സിനിമകളിൽ കാണുന്നപോലെ ഭാവികാലത്തിലേക്കും, ഭൂതകാലത്തിലേക്കും പോയി കാര്യങ്ങൾ മാറ്റിമറിക്കുവാൻ ഇപ്പോഴുള്ള ടെക്നൊളജി കൊണ്ട് സാധ്യമല്ല. ഭാവിയിലും അതിനുള്ള സാധ്യത ഉണ്ടാകുമോ എന്നുമറിയില്ല. എന്നാൽ... നമ്മൾ അറിയാതെതന്നെ നാം നിത്യ ജീവിതത്തിൽ ടൈം ട്രാവൽ ചെയ്യുന്നുണ്ട്. നമ്മൾ വാഹങ്ങളിൽ വേഗത്തിൽ യാത്ര ചെയ്യുമ്പോൾ, വാഹനങ്ങൾ പെട്ടന്ന് മുന്നോട്ട് എടുക്കുമ്പോഴൊക്കെ ഭൂമിയിൽ വെറുതെ നിൽക്കുന്നവരെ അപേക്ഷിച്ചു നമ്മൾ ടൈം ട്രാവൽ ചെയ്യുകയാണ്. പക്ഷെ അത് വളരെ വളരെ കുറവ് സമയം മാത്രം ആയതിനാൽ നമുക്ക്  മനസിലാക്കാൻ പറ്റുന്നില്ല എന്ന് മാത്രം. 

803 ദിവസം ബഹിരാകാശ നിലയത്തിൽ താമസിച്ചയാളാണ് സെർജി ക്രികലേവ്.  അത്രയും നാൾ അദ്ദേഹം സെക്കന്റിൽ 7.5 കിലോമീറ്ററിലധികം വേഗത്തിൽ സഞ്ചരിക്കപ്പെട്ടു. അപ്പോൾ 53 കോടി കിലോമീറ്റർ, സെക്കന്റിൽ 7.66 കിലോമീറ്റർ വേഗത്തിൽ അദ്ദേഹം സഞ്ചരിച്ചു, ഒരു ലോക റെക്കോഡാണിത്. യാത്ര കഴിഞ്ഞു തിരികെ അദ്ദേഹം ഭൂമിയിൽ ഇറങ്ങിയപ്പോൾ 0.02 സെക്കന്റിന്റെ പ്രായക്കുറവ് ഉണ്ടായി. എന്ന് വച്ചാൽ അദ്ദേഹം ഭൂമിയിൽ കഴിഞ്ഞിരുന്നു എങ്കിൽ അല്ലെങ്കിൽ അദ്ദേഹത്തിന് ഒരു ഇരട്ട സഹോദരൻ ഉണ്ടായിരുന്നു എങ്കിൽ ആ സഹോദരനെക്കാൾ 0.02 സെക്കന്റിന്റെ പ്രായക്കുറവ് ഉണ്ടായി എന്ന്. അത് നമുക്ക് മനസിലാക്കാൻ പറ്റുന്നതിനേക്കാൾ വളരെ കുറവാണ്. പക്ഷെ കൃത്യത ഉള്ള ഒരു ക്ളോക്കിൽ അത് വലിയൊരു സമയ വ്യത്യാസം ആണ്. സെക്കന്റിൽ 7.66 കിലോമീറ്ററിന് പകരം സെക്കന്റിൽ ഒന്നര ലക്ഷം കിലോമീറ്റർ വേഗത്തിൽ അദ്ദേഹം സഞ്ചരിച്ചിരുന്നു എങ്കിൽ 803 ദിവസം യാത്ര കഴിഞ്ഞു തിരികെ ഭൂമിയിൽ ഇറങ്ങുമ്പോൾ അദ്ദേഹത്തിന് 4 മാസത്തേ പ്രായക്കുറവ് (സമയക്കുറവ് ) ഉണ്ടാവുമായിരുന്നു. ഇനി സെക്കന്റിൽ 2.7 ലക്ഷം കിലോമീറ്റർ വേഗത്തിൽ ആയിരുന്നു സെർജി സഞ്ചരിച്ചിരുന്നത് എങ്കിൽ 803 ദിവസത്തെ യാത്ര കഴിഞ്ഞു തിരികെ ഭൂമിയിൽ ഇറങ്ങുമ്പോൾ അദ്ദേഹത്തിന്റെ ഇരട്ട സഹോദരനെക്കാൾ ഒരു വർഷത്തിലേറെ ( 13 മാസം ) പ്രായക്കുറവ് വരുമായിരുന്നു. ഇനി അദ്ദേഹം പ്രകാശ വേഗത്തിൽ ആയിരുന്നു സഞ്ചരിച്ചിരുന്നത് എങ്കിൽ 803 ദിവസം യാത്ര കഴിഞ്ഞു തിരികെ വരുമ്പോൾ അദ്ദേഹം പറയും.. " എന്താ ഈ സ്‌പേസ്‌ഷിപ്പ് ഇവിടന്നു പോകാത്തത് " എന്ന് :D . കാരണം, പ്രകാശ വേഗത്തിൽ അദ്ദേഹം എത്രനാൾ സഞ്ചരിച്ചാലും അദ്ദേഹത്തിന്റെ ക്ളോക്ക് ചലിക്കില്ല. അല്ലെങ്കിൽ സമയം മാറില്ല. നമ്മുടെ 803 ദിവസം അദ്ദേഹത്തിന് 0 സെക്കന്റിനു തുല്യം ആയിരിക്കും. പ്രകാശ വേഗത്തിൽ യാത്ര ചെയ്യുക എന്നത് ഒരു ചിന്തയ്ക്കു വേണ്ടി പറഞ്ഞതാണ്. അത് നമുക്ക് സാധ്യമല്ല. എന്നാൽ  മുകളിൽ പറഞ്ഞിരിക്കുന്ന സമയത്തിന്റെ കണക്കുകൾ വളരെ കൃത്യം ആണ് ഇതിനെ ശാസ്ത്രീയമായി ടൈം ഡയലേഷൻ എന്നാണ് പറയുന്നത്. അങ്ങനെ 100 വർഷം മുന്നേ ഐൻസ്റ്റീൻ ഉണ്ടാക്കിയ ആപേക്ഷിക സിദ്ധാന്തം ഇപ്പോൾ നമ്മൾ ഒട്ടനവധി പരീക്ഷണങ്ങളിലൂടെ തെളിയിച്ചു കഴിഞ്ഞിരിക്കുന്നു.

ഇനി സമയത്തെ കുറിച്ചുള്ള ചില പ്രസക്ത ചോദ്യങ്ങളും അവയുടെ ഉത്തരങ്ങളും നോക്കാം.

ചോദ്യം : ഈ സമയം സ്ലോ ആവും എന്ന ആശയം എനിക്ക് ഇത് വരെ മനസ്സിലായിട്ടില്ല... നമ്മൾ സമയത്തെ മനസ്സിലാക്കുന്നത് മൂന്നു രീതിയിൽ അല്ലേ ?

1) ഭൂമിയുടെ കറക്കവും സൂര്യനെ ചുറ്റുന്നതും നോക്കി.

2) ശരീരത്തിലും പ്രകൃതിയിലും നടക്കുന്ന ബയോളജിക്കൽ മാറ്റങ്ങളിലൂടെ.

3) ക്ലോക്ക് കറങ്ങുന്നത് നോക്കി.

സമയം പതുക്കെ ആകും എന്ന് പറയുമ്പോൾ ഇതിൽ ഏതിലാണ് മാറ്റം വരിക ??

ഉത്തരം : സമയം പതുക്കെ ആവുന്നു അല്ലെങ്കിൽ വേഗത്തിൽ ആവുന്നു എന്ന് പറയുന്നത് ആപേക്ഷികം ആണ്. നാം നിൽക്കുന്ന ഇടത്തിൽ സമയം സ്ലോ ആവുകയോ, ഫാസ്റ്റ് ആവുകയോ ചെയ്‌താൽ നമുക്ക് ഒരു തരത്തിലും അത് അനുഭവപ്പെടില്ല. കാരണം.. സമയം സ്ലോ ആവുമ്പോൾ അവിടെ ഉള്ള സകലതും സ്ലോ ആവുന്നു. നമ്മുടെ വികാരവിചാരങ്ങളും, ശാരീരിക പ്രവർത്തങ്ങളും, ക്ളോക്കും, ഒക്കെ സ്ലോ ആവുന്നു. സമയം സ്ലോ ആവുന്നത് നമ്മൾ മറ്റൊരിടത്തെ ഘടികാരവുമായി താരതമ്യം ചെയ്‌താൽ മാത്രമേ അറിയുവാൻ സാധിക്കൂ. ടൈം ഡയലേഷൻ എന്നാണ് ഇതിനു പറയുക.

ടൈം ഡയലേഷൻ 2 രീതിയിൽ സംഭവിക്കും.

1) വളരെ വേഗത്തിൽ സഞ്ചരിച്ചാൽ സമയം പതുക്കെ ആവും.(ആപേക്ഷികം )

2) കൂടിയ ഗ്രാവിറ്റിയിൽ നിന്നാൽ സമയം പതുക്കെ ആവും. (ആപേക്ഷികം )

മറ്റൊരിടവുമായുള്ള താരതമ്യത്തിൽ മാത്രമേ ടൈം ഡയലേഷൻ അറിയൂ എന്നതാണ് ഇവിടെ ആപേക്ഷികം എന്ന് പറഞ്ഞത്.

ചോദ്യം : ടൈം ഡയലേഷൻ സത്യമാണോ ?

ഉത്തരം : അതെ. ടൈം ഡയലേഷൻ പ്രതിഭാസം നമുക്ക് നമ്മുടെ ചുറ്റും കാണുവാൻ കഴിയും. പക്ഷെ വളരെ ചെറിയ അളവിലാണ് എന്ന് മാത്രം.

ഉദാ : നമ്മുടെ 'GPS സാറ്റലെറ്റ്. '

1) GPS സാറ്റലെറ്റ് ഭൂമിയുമായി 14,000 km/hour വേഗത്തിൽ നീങ്ങുന്നു. വേഗത കൂടുമ്പോൾ സമയം സ്ലോ ആവുന്നു എന്നതാണ് വിശിഷ്ട ആപേക്ഷികതാ സിദ്ധാന്തം പറയുന്നത്. ആ കാരണത്താൽ ദിവസവും GPS സാറ്റലെറ്റിലെ ക്ളോക്ക് 7 മൈക്രോ സെക്കന്റ് സ്ലോ ആവുന്നു.

2) GPS സാറ്റലെറ്റ് ഭൂമിയിൽ നിന്നും 20,000 കിലോമീറ്റർ ഉയരത്തിൽ ആണ്. ഗ്രാവിറ്റി കൂടുമ്പോൾ സമയം സ്ലോ ആവുകയും, ഗ്രാവിറ്റി കുറയുമ്പോൾ സമയം ഫാസ്റ്റ് ആവുകയും ചെയ്യുന്നു എന്നാണു സാമാന്യ ആപേക്ഷികതാ സിദ്ധാന്തം പറയുന്നത്

GPS സാറ്റലെറ്റ് പോകുന്ന 20,000 കിലോമീറ്റർ ഉയരത്തിൽ ഭൂമിയുടെ ഗ്രാവിറ്റി കടൽ നിരപ്പിലെ ഗ്രാവിറ്റിയെക്കാൾ കുറവാണ്. ആ രീതിയിൽ 52 മൈക്രോ സെക്കന്റ് ഫാസ്റ്റ് ആവുന്നു. ഇവിടെ ഗ്രാവിറ്റി കുറഞ്ഞു, അതുകൊണ്ടാണ് ഫാസ്റ്റ് ആയത്. ഗ്രാവിറ്റി കൂടിയാൽ സമയം സ്ലോ ആവും. നമ്മൾ സ്ലോ, ഫാസ്റ്റ് എന്നൊക്കെ പറയുന്നത് ഭൂമിയിലെ നമ്മുടെ ക്ളോക്കിനെ അടിസ്ഥാനമാക്കി ആണ്.

അപ്പോൾ GPS സാറ്റലെറ്റ് നു വേഗത കാരണം 7 മൈക്രോ സെക്കന്റ് സ്ലോവും, 52 മൈക്രോ സെക്കന്റ് ഫാസ്റ്റും ആയി. അത് തമ്മിൽ കൂട്ടുകയും കുറക്കുകയും ചെയ്‌താൽ മൊത്തം 52-7 = 45 മൈക്രോ സെക്കന്റ് ഫാസ്റ്റ് ആയി. ഒരു ദിവസത്തെ സമയ വിത്യാസം ആണ് ഈ പറയുന്ന 45 മൈക്രോ സെക്കന്റ്.

ചോദ്യം : 45 മൈക്രോ സെക്കന്റ് ഫാസ്റ്റ് എന്നത് വല്ല കാര്യവും ആണോ ?

ഉത്തരം : വളരെ കൃത്യതയുള്ള കാര്യങ്ങൾക്കാണെങ്കിൽ മൈക്രോ സെക്കന്റ് കാര്യമാവും. അതാണല്ലോ നമ്മൾ ഇത്ര കൃത്യമായി ഇത് കണക്കു കൂട്ടുന്നത്. ഈ 45 മൈക്രോ സെക്കന്റ് ഫാസ്റ്റ് ആകുന്നതു കാരണം GPS സാറ്റലെറ്റിൽ നിന്നും നമ്മുടെ മൊബൈലിലേക്ക് സിഗ്നൽ അയക്കുമ്പോൾ അതിൽ തെറ്റു വരുന്നു.

1 ദിവസം കഴിയുമ്പോൾ ഈ 45 മൈക്രോ സെക്കന്റ് ഫാസ്റ്റ് ആകുന്നതു കാരണം എത്ര ദൂരമാണ് മാറിപോകുന്നതെന്നു നോക്കാം.

ദൂരം = പ്രകാശത്തിന്റെ വേഗത x സമയം

ദൂരം = 3 ലക്ഷം കിലോമീറ്റർ x 0.000045 sec = 13500 മീറ്റർ.

ഒരു ദിവസത്തെ സമയ വിത്യാസം കാരണം GPS വഴി നമ്മുടെ സ്ഥലം കാണിക്കുമ്പോൾ 13.5 കിലോമീറ്റർ വിത്യാസം ആണ് വരിക.

അപ്പോൾ 5 ദിവസത്തെ വ്യത്യാസം കണക്കാക്കിയാൽ എറണാകുളത്തെ എന്റെ വീട് GPS വഴി നോക്കിയാൽ തൃശൂർ ആവും കാണിക്കുക :D

ഇനി പറയു... 45 മൈക്രോ സെക്കന്റ് വിത്യാസം ഒരു പ്രശനം അല്ലെ ? ആണ്, 45 മൈക്രോ സെക്കന്റ് വിത്യാസം ഒരു പ്രശനം തന്നെ ആണ്.

ചോദ്യം : ചന്ദ്രന്റെ ഗ്രാവിറ്റി ഭൂമിയെ അപേക്ഷിച്ചു വളരെ കുറവല്ലേ ?? അവിടെ ടൈം ഫാസ്റ്റ് ആകുമോ ??

ഉത്തരം : ചന്ദ്രനിൽ പോയാൽ ഗ്രാവിറ്റി കുറവ് കാരണം സമയം ഫാസ്റ്റ് ആവും. പക്ഷെ ചന്ദ്രൻ ഭൂമിക്കു ചുറ്റും വേഗത്തിൽ സഞ്ചരിക്കുന്നുമുണ്ട്. അതുകൊണ്ട് സമയം സ്ലോയും ആവും. രണ്ടും കൂടി കൂട്ടിയും കുറച്ചും നോക്കിയാൽ ദിവസവും 0.1 മില്ലി സെക്കന്റ് ഫാസ്റ്റ് ആവും.

ചോദ്യം : പക്ഷെ സമയം സ്ലോ ആവുന്നത് എങ്ങനെ എന്ന് എനിക്ക് ഇപ്പോഴും മനസിലായില്ല...

ഉത്തരം : ശരി. ഞാൻ സിംപിൾ ആയി പറയാം. പക്ഷെ ഇത് ശാസ്ത്രീയം അല്ല. കാര്യം മനസിലാക്കുവാൻ വേണ്ടി മാത്രം പറയുന്നതാണ്.

നമ്മൾ എല്ലാം മെഷീനുകൾ പോലെ എന്ന് കരുതുക. നമ്മൾ നടക്കുന്നതും, ചിന്തിക്കുന്നതും, നമ്മുടെ കോശങ്ങൾ വളരുന്നതും എല്ലാം വാച്ചിലെ പോലെ ടിക്ക്.. ടിക്ക്.. സ്പന്ദനത്തിൽ ആണെന്നും കരുതുക. ഒരു ടിക്ക് നു 1 സെക്കന്റ് വച്ച്.

അപ്പോൾ ടിക്ക്---ടിക്ക്---ടിക്ക്---ടിക്ക്---ടിക്ക്--- എന്നടിക്കുമ്പോൾ നമ്മൾ ഇപ്പോൾ ഉള്ള രീതിയിൽ നടക്കുന്നു, ചിന്തിക്കുന്നു, വളരുന്നു..

ഇനി ടിക്ക്------------------ടിക്ക്------------------ടിക്ക്------------------ടിക്ക്------------------ടിക്ക്------------------ എന്ന് സമയം സ്ലോ ആയാൽ നമ്മുടെ നടത്തവും, ചിന്തയും, വളർച്ചയും ഒക്കെ സ്ലോ ആവും.

ഇനി സമയം ടിക്ക്-ടിക്ക്-ടിക്ക്-ടിക്ക്- എന്ന് സ്പീഡ് ആയാൽ നമ്മുടെ നടത്തവും, ചിന്തയും, വളർച്ചയും ഒക്കെ ഫാസ്റ്റ് ആവും.

എല്ലാം സമയത്തെ അടിസ്ഥാനം ആക്കി ആണ്. അപ്പോൾ സമയം ടിക്ക് എന്നാണ് അടിച്ചു നിന്നുപോയാലോ ?? നമ്മളും നിൽക്കും. നമ്മുടെ ആലോചനയും, വളർച്ചയും ഒക്കെ നിൽക്കും. അതുകൊണ്ടുതന്നെ സമയം ഫാസ്റ്റ് ആയോ, സ്ലോ ആയോ, നിന്നോ എന്നൊന്നും നമുക്ക് അറിയുവാൻ സാധിക്കില്ല. ഇതിനെ കുറിച്ച് ഇപ്പോൾ ഏകദേശം മനസ്സിലായെന്ന് കരുതുന്നു.

ഇനി ചില രസകരമായ കാര്യങ്ങൾ..

( ഇത് ഒരു ബൗദ്ധീക ചിന്ത മാത്രം ആണ്. ശാസ്ത്രീയമായി തെളിഞ്ഞ കാര്യം അല്ല. )

നമ്മൾ ഓരോരുത്തരും ഇപ്പോൾ ഈ കാലത്തിൽ ആയിരിക്കില്ല ജീവിക്കുന്നത്...

X ഇപ്പോൾ 2020 ഇൽ ആയിരിക്കാം ജീവിക്കുന്നത്.. അല്ലെങ്കിൽ ചിന്തിക്കുന്നത്. അതുപോലെ Y ചിലപ്പോൾ 2010 ഇൽ ആയിരിക്കാം ജീവിക്കുന്നത്.

എന്നുവച്ചാൽ കാലമാകുന്ന പുസ്തകത്തിന്റെ സമയമാകുന്ന പേജുകളിൽ, നാം ആ പേജിലെ ആളുകളെ കാണുന്നു, കമ്യൂണിക്കേറ്റ് ചെയ്യുന്നു. പക്ഷെ നിങ്ങളോരോരുത്തരുടേയും മനസു കാണുന്നത് മറ്റു പേജുകൾ ആവാം.

ഞാൻ ഇപ്പോൾ 2018 ജനുവരി-20 ഇൽ ആണ് ജീവിക്കുന്നതെന്ന് എനിക്കറിയാം. പക്ഷെ എപ്പോൾ വേണമെകിലും ഞാൻ കാലത്തിൽ മുന്നോട്ട് പോവുകയോ, പിന്നോട്ട് പോവുകയോ ചെയ്യാം. പക്ഷെ ഇപ്പോഴും എനിക്ക് കഴിഞ്ഞു പോയ കാലം മാത്രമേ ഓർക്കുവാൻ സാധിക്കൂ. എന്ന് വച്ചാൽ ഞാൻ ഇനി 2014 ലേക്ക് പോയാൽ ഞാൻ അല്ലെങ്കിൽ എന്റെ തലച്ചോറിൽ നിന്നും ഇപ്പോഴുള്ള മെമ്മറി ഒക്കെ മാഞ്ഞു പോകും. ചുരുക്കി പറഞ്ഞാൽ നമ്മളൊക്കെ ഒരു കാസറ്റ് ടേപ്പിൽ റെക്കോഡ് ചെയ്തു വച്ചിരിക്കുന്നപോലെ ചെയ്തുകൊണ്ടിരിക്കുന്ന സംഭവങ്ങൾ ആണ്. ഭാവി, ഭൂതം, വർത്തമാന കാലങ്ങളൊക്കെ ഇവിടെയുണ്ട്. അതുപോലെ സമയത്തിന്റെ വേഗതയും നമുക്ക് വിത്യസ്തമായാവും അനുഭവപ്പെടുക. എല്ലാം നമ്മുടെ മനസിന്റെ കാഴ്ചപ്പാട് മാത്രം. സമയം ഒരു മായ ആണ്.